Adu a netizen ti nangbabalaw ken ni Senador Ronald "Bato" dela Rosa gapu iti kiddawna a mangusar iti Senate Mansion iti Baguio City, iti laksid ti panaglanganna iti Senado sipud idi Nobiembre 2025.
Ti Senate Mansion ti kadawyan a pagdagusan dagiti senador iti opisial nga aktibidad iti Baguio City.
Iti maysa a surat, kiniddaw ni Dela Rosa nga usaren koma ti pamiliana ti Senate Mansion para iti umadani a CSAFP Cup 2026.
Kinompirmar ni Senate President Vicente "Tito" Sotto III nga adda impatulod ni Dela Rosa a surat idi Marso 12 a dumawdawat iti pammalubos nga agtarus ti pamiliana iti Senate Mansion manipud Marso 26 agingga Marso 29.
Segun ken ni Sotto, intednan ti kiddaw ni Dela Rosa iti Senate Secretary a ni Mark Llandro Mendoza.
Dati a sekretario ti DILG Sarmiento, nadutokan a baro nga adviser ti OPAPRU
Ngem kinuna ni Mendoza a saan a mapatgan ti kiddaw ni Dela Rosa ta ipatpatarimaanda ti mansion ken maibasar iti paglintegan ti Senado, rumbeng a kaduaen ni Dela Rosa ti pamiliana nga agdagus sadiay.
Binabalaw dagiti netizen daytoy a tignay ni Dela Rosa, nangruna ta nabayagen a naglangan ti senador, ket saanna a matungutungpal dagiti annongenna.
Inlawlawag ni Sotto a saan a daytoy ti damo a pannakiuman ni Dela Rosa kenkuana sipud idi saanen a nagparparang daytoy iti Senado sipud idi Nobiembre 2025.
Nagpirma pay ni Dela Rosa iti Resolution 343, nga inanamongan ti Senado idi Marso 10 a mangguyugoy iti ehekutibo a mangbukel iti National Contingency Plan a mangtaming iti epekto ti gubat iti Middle East. (Dhel Nazario//Manila Bulletin//Lito Hilidon/Bannawag)
