Panggep ti Kamara a maipasa ti 17 kadagiti 52 a prioridad a paglintegan a karaman iti Legislative-Executive Development Advisory Council (LEDAC) Common Legislative Agenda iti ngudo ti lawas, sakbay ti panag-adjourn ti Kongreso para iti panawen ti Kuaresma.
Ti LEDAC Common Legislative Agenda (CLA) ti listaan dagiti prioridad a paglintegan nga inanamongan ti Ehekutibo ken Kongreso (Kamara ken Senado). Maibasar iti bilang ti Kamara, 52 a singasing a paglintegan ti kitkitaenda sipud idi Marso 12.
Manipud iti dayta a listaan, addan uppat a singasing a linteg a maanamongan iti maikatlo ken maudi a pannakaibasana ita a lawas kas iti Travel Tax Abolition; Digital Payments Act; pannakaamendar ti Universal Access to Quality Tertiary Education Act; ken ti Presidential Merit Scholarship Program.
Dua a singasing a paglintegan iti LEDAC CLA ti addan iti sidong ti bicameral conference committee: ti National Center for Geriatric Health bill ken ti gakat a Resetting the First Regular Elections in the Bangsamoro Autonomous Region in Muslim Mindanao (BARMM).
Naanamonganen ti 11 a LEDAC priority bill iti maikatlo ken pinal a pannakaibasana iti Kamara, kas iti pannakaamendar iti Electric Power Industry Reform Act (EPIRA); Waste-to-Energy or Waste Treatment Technology; pannakaamendar ti Government Assistance to Students and Teachers in Private Education Act; Assistance to Individuals in Crisis Situations (AICS Act); pannakaamendar ti National Building Code; Blue Economy Act; National Reintegration Bill; pannakaamendar ti Teachers Professionalization Act; pannakayalud-od ti Estate Tax Amnesty Period; Department of Water Resources Bill; ken pannakaamendar ti Bank Deposits Secrecy Law.
Dati a sekretario ti DILG Sarmiento, nadutokan a baro nga adviser ti OPAPRU
No maanamongan dagiti uppat a singasing a linteg a nadakamat iti ngato, agdagupen iti 17 ti LEDAC bill a naanamongan ti Kamara.
Malaksid iti daytoy, adda pay tallo a singasing a linteg a dandanin maanamongan iti Kamara kas iti Anti-Political Dynasty Bill; National Land Use Act; ken ti pannakaamendar ti Biofuels Act.
Segun ken ni House Majority Leader Ilocos Norte 1st district Rep. Ferdinand Alexander “Sandro” Marcos, daytoy a sayangkat ti panangipakitada nga agtrabtrabaho ti Kamara tapno maipaulog dagiti programa a prioridad ti administrasion.
Mangrugi ti Lenten break ti Kongreso inton Marso 19, ket agsublida inton Mayo 4. (Ellson Quismorio/Manila Bulletin//Lito Hilidon/Bannawag)
