Im-imbestigaren ti Embahada ti Filipinas iti Abu Dhabi ti report nga adda Filipino a naarestar iti United Arab Emirates (UAE) gapu iti panangipaskil ken panangi-share-da iti video iti internet mainaig iti panangraut ti Iran iti pagilian.
Segun kadagiti opisial ti embahada, kompirmarenda ti report manipud iti UAE nga adda dua wenno tallo a Filipina kadagiti tattao a nadumaduma ti nasionalidadda nga inarestar dagiti autoridad ti UAE gapu iti panangipaskilda kadagiti video ti panangruat ti Iran ken ti panangdepensa ti UAE.
Iparit ti paglintegan ti UAE ti panangi-share iti content a mangsinga iti kinatalged ti publiko.
Inyebkas ti Embahada ti Filipinas ken Philippine Consulate General iti Dubai ti panangraemda iti kinaagwaywayas ti UAE ken ti kalinteganna a mangipatungpal iti paglintegan ti pagilianda mainaig iti seguridad, cybercrime, ken kinaurnos ti publiko.
Pinalagipan ti gobierno ti UAE ti publiko a ti panangipablaak wenno panangibinglay iti mangallilaw ken pinarpartuat a content a mainaig iti seguridad, agraman video ti air defense interceptions, panangraut kadagiti pasdek, wenno palso a video a partuat ti AI, ket maibilang a maysa a krimen a madusa babaen ti pannakaibalud ken panagmulta iti dakkel a gatad.
Dati a sekretario ti DILG Sarmiento, nadutokan a baro nga adviser ti OPAPRU
Binalakadan ti gobierno ti UAE dagiti Filipino a liklikanda ti agirekord, agipaskil, mangipatulod, wenno agkomento iti saan a napatalgedan wenno senstibo ken mainaig iti seguridad a content; tapno maliklikan ti panangiwaras iti sayangguseng wenno saan a pudno nga impormasion ken agpannuray laeng iti opisial a dokumento dagiti autoridad ti UAE ken mapagtalkan a pagtaudan ti impormasion mainaig iti agdama a kasasaad ti seguridad.
Iti sabali a bangir, pinakdaaran ti Philippine Embassy iti Manama dagiti Filipino nga adda iti Bahrain nga adda met paglinteganda a mangiparit iti pananglabsing iti personal privacy ti maysa a tao, a pakairamanan ti panangala iti retrato, panangirekord, ken panangipablaak iti pribado, pamilia, wenno sensitibo nga eksena nga awan pammalubos ti maseknan a tao, kas sagudayen ti Bahrain Penal Code Article 370.
Maibasar iti daytoy a paglintegan, madusa iti lima a tawen a pannakaibalud ken multa agingga iti 5,000 a Bahraini Dinar, dagiti aglabsing, nangruna no naipaskil iti social media wenno iti publiko a lugar dagitoy. (Joseph Pedrajas/Manila Bulletin//Lito Hilidon/Bannawag)
