Inlungalong dagiti senador ita nga aldaw, Marso 16, ti napigpigsa a paglintegan para iti anti-bullying kadagiti pagadalan, bayat a mareprepaso ti agdama a paglintegan gapu iti yaadu ti kaso ti bullying kadagiti Filipino nga estudiante.
Iti hearing nga inangay ti Committee on Basic Education ti Senado nga idadauluan ni Senador Bam Aquino, kinunana a dakkel a pakaseknan dagiti nagannak ken komunidad ti kaso ti bullying ket dinakamatna ti datos a nasaknap latta ti bullying kadagiti pagadalan iti Filipinas.
Segun ken ni Aquino, naangay ti hearing gapu iti pakaseknan nga agbalinen dagiti pagadalan a lugar a pagbutbutngan imbes a lugar a pagsursuruan, pagrang-ayan, ken pannakipagrikna.
Dinakamat ni Aquino ti sukisok ti Second Congressional Commission on Education (EDCOM 2) a mangipakpakita a ti Filipinas ti maibilang a kas “bullying capital of the world,” idinto a 50 a porsiento kadagiti adalan iti Grado 5 ti nagipulong a mapadasanda ti ma-bully maminsan iti makabulan, ken maysa kadagiti tallo a Filipino ket mapadasanda ti ma-bully kadagiti pagadalan.
Suportaran met ni Senador Erwin Tulfo daytoy a singasing a mangpasaknap iti sakupen ti Republic Act No. 10627 wenno ti Anti-Bullying Act of 2013, ta amangan no saanen nga umdas dagiti agdama a wagas tapno malapdan dagiti maulit-ulit nga aramid ti panang-bully.
Dati a sekretario ti DILG Sarmiento, nadutokan a baro nga adviser ti OPAPRU
Segun ken ni Tulfo, masapul nga agbalin a naridam dagiti pagadalan nga agresponde nangruna no mabuteng dagiti estudiante nga agreklamo, ken nadaras koma ti panagtignayda kadagiti report wenno nabatad a pagilasinan ti panang-bully, ket saanen nga urayen nga agbalin a viral dagitoy sakbay nga agresponde dagiti autoridad.
Insingasing ni Tulfo ti naing-inget a pannakipatungpal ti polisia ti anti-bullying kadagiti pagadalan, nadagdagsen a dusa dagiti pagadalan a saan nga agtignay, pannakaipasdek dagiti closed-circuit television camera iti siled-pagadalan, mandatory counseling ken psychological support, panagsanay ti mannursuro ken nagannak, nabileg a panangisuro iti Good Manners and Right Conduct (GMRC), kanayonan a seguridad iti pagadalan, ken epektibo nga anonymous reporting system. (Wilnard Bacelonia/Manila Bulletin//Lito Hilidon/Bannawag)
