Kinompirmar ti Embahada ti Filipinas iti Abu Dhabi idi Marso 16 nga adda dua a mangmangged a Filipino a naarestar iti United Arab Emirates (UAE) gapu iti panangi-share-da iti bideo ti panangraut ti Iran ken ti pannakalappedda iti daytoy.
Segun iti embahada, pinatalgedan ti UAE ti report ken nangipaayda iti impormasion iti pakabigbigan dagiti dua nga overseas Filipino workers (OFW) ken ti makagapu iti pannakaarestarda.
Ammon ti embahada ti yan dagiti OFW, ket makium-umanda iti pamilia dagiti naapektaran nga OFW a mangipaayda iti kaudian a padamag ken naan-anay a tulong.
Innayon ti embahada a maikkan iti legal a tulong dagiti OFW babaen ti abogado ti embahada, ket nangipatuloddan iti kiddaw kadagiti autoridad ti UAE tapno sarungkaranda dagiti nakemmeg nga OFW, a masapul nga aprobaran dagiti autoridad. (Joseph Pedrajas/Manila Bulletin//Lito Hilidon/Bannawag)
