Indauluan ni Presidente Marcos Jr. ita nga aldaw, Marso 17, ti umuna a pannakaiwaras iti tulong pinansial kadagiti 30,000 a drayber ti traysikel iti Sta. Mesa, Manila.
Segun ken ni Marcos, daytoy ti umuna a panakaiwaras iti tulong a pinansial para kadagiti drayber ti traysikel a naapektaran ti ingingina ti presio ti lana, ket sumarunonto met a maikkan dagiti drayber ti jeepney ken TNVS inton umay a lawas.
Karaman kadagiti maikkan iti ₱5,000 a fuel subsidy dagiti drayber ti motorsiklo, taxi, jeepney, ken bus iti Metro Manila.
Segun ken ni Executive Secretary Ralph Recto, maisaknap ti programa iti entero a pagilian inton Abril, apaman a malpas ti Department of Social Welfare and Development (DSWD), Department of Transportation (DOTr), ken ti Land Transportation Franchising and Regulatory Board (LTFRB) ti listaan dagiti benepisiario.
Malaksid iti daytoy, kinuna ni Recto nga isayangkat ti gobierno ti Libreng Sakay Program tapno matulongan dagiti inaladaw nga agbibiahe kas kadagiti estudiante ken empleado. (Betheena Unite/Manila Bulletin//Lito Hilidon/Bannawag)
