Nagkiddaw dagiti pagilian iti Europa idi Marso 16 iti nalawlawag a detalye no ania ti plano ni U.S. President Donald Trump iti gubat iti Iran ken impakdaarda a saan a rumbeng a makibiang ti NATO iti dayta, bayat nga ad-adalenda no anamonganda ti kiddaw ni Trump a mangipatulod iti bapor a para gubat tapno tumulong iti seguridad iti Persian Gulf.
Ti nalamiis a sungbat iti kiddaw ni Trump ket mangipakita iti nasaknap a panagannad maipapan iti gubat ti US-Israel kadagiti kaaliado a saan a nakaaam-ammo maipanggep iti gubat idi, ken aglalo manipud idi nangrugi ti gubatda idi Pebrero 28.
Kiniddaw ni Trump kadagiti kaaliado ti US a pakairamanan ti France, China, Japan, South Korea. ken Britain a tumulongda nga agbantay iti seguridad ti Strait of Hormuz a pagpagnaan dagiti barko a mangibibiahe iti lana iti sangalubongan.
Ngem impaganetget ni U.K. Prime Minister Keir Starmer a saan a makiraman ti Britain iti nasaksaknap a gubat ket maibaon laeng dagiti soldadoda kadagiti legal nga aramid ken addaan umisu a plano.
Iti pananginterbiu ti Financial Times, impakdaar ni Trump a no awan ti sungbat wenno saan a kayat ti NATO ti tumulong, saan a nasayaat daytoy para iti masakbayan ti NATO.
Dati a sekretario ti DILG Sarmiento, nadutokan a baro nga adviser ti OPAPRU
Ngem inlawlawag ni German Chancellor Friedrich Merz a maysa nga aliansa para iti depensa ti panggep ti NATO, saan a pannakibiang, isu a di rumbeng a makibiang ti NATO iti gubat iti Iran.
Kinuna ni Merz a nupay anamonganna a masapul nga agpatinggan ti agdama a rehimen ti Iran, ngem saan a ti panangraut iti Iran ti umisu a pamuspusan.
Iti taripnong dagiti foreign minister ti European Union a naangay iti Brussels, kinuna ni Foreign Minister ti Germany Johann Wadephul a masapul nga ikeddeng ti US ken Israel no kaano nga ibilangda a natungpalen dagiti militar a panggep ti pannakaibaonda sadiay. (The Associated Press/Manila Bulletin//Lito Hilidon/Bannawag)
