Inaprobaran ti Land Transportation Franchising and Regulatory Board (LTFRB) ti petision a mangipangato iti plete para iti dandani amin a public utility vehicle (PUV), gapu iti agsasaruno a panagngato ti presio ti lana.
Maipatungpal dagiti baro a plete inton Marso 19.
Segun ken ni LTFRB Chairman Atty. Vigor D. Mendoza, tinimbengda ti pagimbagan dagiti minilion nga agbibiahe iti inaldaw ken ti kasasaad dagiti adda iti tay-ak ti public transportation.
Para iti gagangay a jeepney, ngimmato ti kababaan a plete (minimum fare) iti ₱1 para iti umuna nga uppat a kilometro, sa 20 a sentimo (₱0.20) para iti sumaganad a kilometro, isu nga agbalinen a ₱14 ti minimum fare manipud iti dati a ₱13.
Para kadagiti modern jeepney, agbalinen a ₱17 ti minimum fare, manipud iti dati a ₱15.
Dati a sekretario ti DILG Sarmiento, nadutokan a baro nga adviser ti OPAPRU
Para iti ordinary city bus, nagbalinen a ₱15 ti minimum fare manipud iti dati a ₱13; idinto a ₱18 ti minimum fare kadagiti air-conditioned city bus, manipud iti dati a ₱15.
Kadagiti ordinario a provincial bus, agbalinen a ₱12 ti minimum fare para iti umuna a lima a kilometro; idinto a manayonan iti 30 a sentimo (₱0.30) kadagiti sumarsaruno a kilometro.
Para iti airconditioned provincial bus, agbalinen a ₱2.45 ti mainayon kada kilometro; ₱2.60 ti kada kilometro iti de luxe a bus; ₱2.70 kada kilometro iti super de luxe, idinto a ₱3.35 kada kilometro iti luxury provincial bus.
Inlawlawag ni Mendoza nga inadalda a naimbag ti pannakaingato ti plete, a sinuportaran ti datos ken panaganalisar ti Department of Economy, Planning, and Development. (Aaron Recuenco/Manila Bulletin//Lito Hilidon/Bannawag)
