Indatag ni Bise Presidente Sara Duterte ti naisurat a sungbatna iti kaso nga impeachment a maibusor kenkuana idi Marso 16, no maibilang a sungbat daytoy.
Segun ken ni Bicol Saro Party-list Rep. Terry Ridon, indatag ni Duterte ti Consolidated Answer Ad Cautelam iti Committee on Justice ti Kamara idi Lunes (Marso 16) iti malem.
Ni Ridon ti umuna a kameng ti komite a nangibinglay iti kapanunotanna iti 15 a panid a dokumento nga indatag ti kampo ni Duterte, ket kinunana a saan a sinungbatan ni Duterte dagiti alegasion a dinakamat ti dua nga impeachment complaint.
Kinuna ni Ridon nga imbes a sungbatan ni Duterte dagiti alegasion, kinaritna ketdi ti proseso ti impeachment maibasar iti nariro nga interpretasion ti due process ken ti mainaig iti makunkuna nga "ultimate fact" iti kaso nga impeachment.
Inlawlawag ni Ridon a saan a nalabsing ti kalintegan ni Duterte iti due process, ta inikkanda daytoy iti gundaway a sumungbat babaen ti Answer Ad Cautelam, nupay kasta, saan met a sinupiat wenno sinungbatan ni Duterte dagiti kangrunaan nga alegasion a nadakamat iti impeachment complaint.
Dati a sekretario ti DILG Sarmiento, nadutokan a baro nga adviser ti OPAPRU
Binabalaw ni Ridon ti sungbat ni Duterte ket kinunana a biddut ti ibagbaga ni Duterte a saan a nailanad iti impeachment complaint dagiti makunkuna nga "ultimate fact."
Segun ken ni Ridon, nalawag a nailanad kadagiti impeachment complaint ken dokumento nga ebidensia dagiti makunkuna nga "ultimate fact" mainaig iti saan nga umno a pannakausar iti confidential funds; panangipangta iti biag ti Presidente, ti First Lady, ken ti dati nga speaker ti Kamara; saan a mailawlawag a panagbaknang ken pananglabsing iti rekititos ti statement of assets, liabilities, and net worth (SALN).
Maibasar iti Answer Ad Cautelam nga indatag ni Duterte, kinunana a dagiti linaon ti impeachment complaint ita a tawen ket awan dumana iti Articles of Impeachment idi 2025 nga indeklarar ti Korte Suprema nga unconstitutional.
Nupay binalusingsing ti Korte Suprema ti kaso nga impeachment ni Duterte idi 2025, nabalusingsing daytoy gapu laeng iti pananglabsing iti one-year bar rule iti panangipila iti kaso nga impeachment, ngem saanda nga inabsuelto ni Duterte kadagiti alegasion a maibusor kenkuana. (Ellson Quismorio/Manila Bulletin//Lito Hilidon/Bannawag)
