Inaprobaran ti Kamara idi Marso 17 ti resolusion a mangipalubos iti House Committee on Justice a mangituloy iti pannakataming iti kaso nga impeachment a maibusor ken ni Bise Presidente Sara Duterte uray naka-recess ti Kongreso, manipud Marso 21 agingga Mayo 3.
Indatag da Speaker Faustino “Bojie” Dy III (Isabela), Majority Leader Sandro Marcos (Ilocos Norte), ken Minority Leader Marcelino “Nonoy” Libanan (4Ps Party-list) ti House Resolution (HR) No. 892 a mangipalubos iti nasao a komite nga ldadauluan ni Batangas 2nd district Rep. Gerville Luistro a tamingenda dagiti bambanag a mainaig iti kaso nga impeachment uray saan a naka-sesion ti Kamara.
Segun iti resolusion, mabalin a mangisayangkat iti hearing dagiti komite kas panangtungpal iti annongenda uray naka-recess ti Kamara, no la ket palubosan ti Kamara.
Maitunos daytoy iti Pagalagadan ti Kamara a mapalubosan dagiti komite a mangangay kadagiti hearing, umawat kadagiti ebidensia, ken mangipaulog kadagiti compulsory process kas iti subpoena ad testificandum ken subpoena duces tecum, kas panangtungpal iti annongen ken pagrebbenganda.
Naikkan pay ti Committee on Justice iti karbengan a mangipatungpal iti Section 8 of the Rules of Procedure in Impeachment Proceedings, a mangsalaknib kadagiti nagreklamo wenno testigo no maipakitada nga adda pangta iti biag dagitoy gapu iti pannakipasetda iti proseso ti impeachment. (Ellson Quismorio/Manila Bulletin//Lito Hilidon/Bannawag)
