Agpannuray iti panagtignay ti presio ti lana iti sangalubongan a merkado ti pangngeddeng ti gobierno a mangsuspenso wenno mangkissay iti fuel excise tax, gapu ta saan a mapakadaan ti situasion a pinataud ti gubat iti Middle East.
Daytoy ti kinuna ni Presidente Marcos Jr. ita nga aldaw, Marso 18, kalpasan nga inanamongan ti Kongreso iti maikatlo ken maudi a pannakaibasa ti linteg a mangipaay iti karbengan iti presidente a mangsuspenso wenno mangkissay iti buis dagiti produkto ti petrolio tapno kabaelan ti gobierno ti napardas nga agresponde iti saan a natalged a presio ti lana iti sangalubongan.
Segun ken ni Marcos, bambantayan ti gobierno ti panaggaraw ti presio iti sangalubongan sakbay nga ikeddengda no kaano wenno mano ti rumbeng maikissay a buis, agraman ti kasasaad iti Strait of Hormuz.
Kuna ni Maros a nupay saan a natalged dagit presio iti sangalubongan a merkado, saan pay a parikut ti pagilian ti suplay iti gasolina ken dadduma pay a kasapulan a produkto.
Innayon ni Marcos a prioridad ti gobierno a pagtalinaeden ti natalged a suplay, bayat ti panangmonitorda iti panaggaraw dagiti presio ken ti umno a tiempo a panangipakatda iti pannakakissay iti buis. (Argyll Cyrus Geducos/Manila Bulletin//Lito Hilidon/Bannawag)
