Ad-adalen ni Senador Sherwin Gatchalian ti posibilidad a maiparit ti social media kadagiti menor de edad kalpasan a naammuanna ti report manipud iti polisia a napengdanda ti maipagarup a plano ti grupo dagiti estudiante a mass shooting iti pagadalanda.
Iti maysa nga statement idi Marso 18, kuna ni Gatchalian a ti nasinga a panggep ket agserbi koma a mangriing, idinto a mabalin a naimpluensiaan ti online gaming community dagiti nakemmeg nga agtutubo.
Kinuna ni Gatchalian a dakkel a pakaseknan ti kasasaad ti salun-at ti panunot dagiti estudiante, isu a kasapulan ti naan-anay a sistema ti panangsuportar manipud iti pagadalan.
Makium-uman itan ti Philippine National Police Anti-Cybercrime Group (PNP-ACG) kadagiti internet service provider (ISP) kalpasan a nakemmegda ti pito nga agtutubo nga agtawen iti 15 iti Laguna a maipagarup nga agpangpanggep a mangisayangkat iti mass shooting.
Segun iti report, adda nakasarita dagiti ubbing a di am-ammo a tao iti online idi Enero a nangimpluensia kadakuada nga isayangkatda ti mass shooting ken binilinna ida a mapanda iti sabali a platform tapno makaalada iti paltog.
Dati a sekretario ti DILG Sarmiento, nadutokan a baro nga adviser ti OPAPRU
Nabaelan a sapulen dagiti kameng ti ACG dagiti estudiante iti online ket kinemmegda dagitoy sakbay a makagatangda iti igam.
Addada itan iti sidong ti opisina ti DSWD sipud idi napan a bulan.
Segun ken ni Gatchalian, panggepna ti mangidatag iti gakat a mangiparit kadagiti menor de edad a mangusar iti social media, kas inaramid dagiti pagilian nga Australia, Denmark, ken Norway.
Innayon ni Gatchalian, a saan koman nga urayen a kumaro pay ti parikut dagiti agtutubo sakbay nga agtignay ti publiko. (Leonel Abasola/PNA//Lito Hilidon/Bannawag)
