Sinabet ni President Marcos Jr. ti maysa manen a grupo dagiti napagawid nga overseas Filipino worker (OFW) manipud iti Middle East, bayat ti agtultuloy a sayangkat ti gobierno a mangibakuit kadagiti Filipino a nailakon kadagiti pagilian iti rehion iti baet ti maar-aramid a gubat sadiay.
Agdagup iti 343 dagiti napagawid -- a buklen ti 317 nga OFW ken 26 a dependent-da manipud iti Kuwait, Bahrain, Qatar, ken Saudi Arabia -- ti simmangpet iti Villamor Air Base iti Siudad ti Pasay itay 6:30 iti agsapa ita nga aldaw, Marso 23 babaen ti Philippine Airlines.
Personal a pinasangbay ni Marcos dagit nagsublin a Filipino ken inwardasna ti pannakaipaay ti tulong, agraman ti pinansial a tulong, medikal a suporta, ken psychosocial services, ngem saan a nagpainterbiu kadagiti kameng ti media.
Daytoyen ti maikapat a government-chartered flight iti sidong ti repatriation program ti gobierno.
Nasuroken a 1,400 nga OFW ken 334 a dependent-da ti nagsublin iti pagilian manipud iti Marso 5 agingga 17.
Dati a sekretario ti DILG Sarmiento, nadutokan a baro nga adviser ti OPAPRU
Segun ken ni Department of Migrant Workers (DMW) Secretary Hans Leo Cacdac, adu kadagitoy nga OFW ti nagbiahae pay babaen ti daga sakbay a nakalauganda iti eroplano gapu iti pannakaiserra dagiti airspace kadagiti dadduma a paset ti Middle East.
Innayon ni Cacdac nga agsagsagana ti gobierno a mangyawid kadagiti agarup 1,200 pay a Filipino kadagiti sumarsaruno nga aldaw, ket panggepda nga agala iti chartered flight manipud iti United Arab Emirates. (Argyll Cyrus Geducos/Manila Bulletin//Lito Hilidon/Bannawag)
