Awan pay ti naipila a singasing a linteg a mangipaay iti emergency power iti presidente a mangsuspenso wenno a mangkissay iti excise tax kadagiti produkto a petrolio, segun ken ni Senate President Vicente "Tito" Sotto III ita nga aldaw, Marso 23.
Iti laksid daytoy iti pannakaanamong iti bersion ti Kamara iti daytoy a linteg.
Iti maysa a mensahe kadagiti reporter, kinuna ni Sotto nga awan pay ti nayawat kadakuada a dokumento manipud iti Kamara, tapno mapirmaan ken mayawaten iti presidente daytoy.
Iti Marso 17, babaen ti botos a 17-0-0 (wen-saan-abstain), inaprobaran ti Senado ti Senate Bill (SB) No. 1982 wenno ti "Act Authorizing the President to Suspend or Reduce excise Tax on Petroleum Products, amending for the purpose Article 148 of the National Internal Revenue Code of 1997."
Inadaptar ti Kamara ti bersion ti Senado iti daytoy a linteg idi Marso 18 a ken saanen a kasapulan nga agdalan daytoy iti bicameral conference committee.
Dati a sekretario ti DILG Sarmiento, nadutokan a baro nga adviser ti OPAPRU
Mayawat laeng iti presidente ti singasing a linteg no mapirmaan ti Senate President ken House Speaker ti enrolled bill.
Ti singasing a linteg ti mangipaay iti karbengan iti Presidente a mangsuspenso wenno mangkissay iti excise tax iti produkto a petrolio iti baet ti mapaspasamak a gubat iti Middle East. (Dhel Nazario/Manila Bulletin//Lito Hilidon/Bannawag)
