Saanen a nasken nga urayen ti 2028 election tapno makita no maikari ni Bise Presidente Sara Duterte ng agakem iti Malakanyang, ta maiparangarang dayta babaen ti kaso nga impeachment a naipila kontra kenkuana.
Daytoy ti kinuna ni daulo ti Committee on Justice ti Kamara Batangas 2nd district Rep. Gerville Luistro iti maysa nga interbiu iti radio itay napan a lawas.
Segun ken ni Luistro dagiti agtarigagay nga agakem iti pagsaadan iti gobierno iti mapasungad ti nangnangruna nga agbalin a naimbag a pagtuladan ti panangsungbat iti basol.
Inlawlawag ni Luistro nga annongen dagiti Filipino ti agpaliiw ken mangikeddeng no asino ti sumaruno a presidente mainaig iti proseso ti impeachment.
Kuna ni Luistro a saanen a maisina ti 2028 election ti proseso ti impeachment gapu ta inyebkasen ni VP Duterte ti tarigagayna nga agngayangay a kas presidente inton 2028. Ket ti proseso ti impeachment ti maysa kadagiti wagas tapno mailasin dagiti Filipino no maikari met laeng ti bise presidente nga agbalin a kas sumaruno a presidente ti pagilian.
Dati a sekretario ti DILG Sarmiento, nadutokan a baro nga adviser ti OPAPRU
Patien ni Luistro a saan a dumar-ay ni Duterte iti ania man a panangbista ti komite kalpasna a indatag dagiti abogadona ti Consolidated Verified Answer Ad Cautelam idi Marso 16 a nagkuna nga awan ti alegasion a rumbeng a sungbatanda mainaig iti dua nga impeachment complaint a maibusor iti respondent.
Idi Marso 18, indeklarar ti komite nga adda umdas a pagbatayan (sufficient grounds) ti dua nga impeachment complaint, ket naikeddeng a maangay ti hearing proper inton Marso 25. (Ellson Quismorio/Manila Bulletin//Lito Hilidon/Bannawag)
