Agdagup iti 2,629 a drayber ti Transport Network Vehicle Service (TNVS) ti naikkan ti fuel subsidy iti Manila manipud iti nailian a gobierno ita nga aldaw, Marso 24, a nangipaay iti bang-ar iti baet ti ngumatngato a presio ti lana gapu iti gubat iti Middle East.
Segun ken ni Manila Mayor Francisco "Isko Moreno" Domagoso, naangay ti pannakaiwaras ti ayuda iti Kartilya ng Katipunan a dumna iti Manila City Hall, babaen ti pannakitinnulong ti Manila Department of Social Welfare and Development (MSWD) ken ti Manila Traffic and Parking Bureau (MTPB).
Naikkan iti ₱5,000 a kuarta ti tunggal kualipikado a drayber manipud iti Assistance to Individuals in Crisis Situations (AICS) a programa ti Department of Social Welfare and Development (DSWD) ken ti Land Transportation Franchising and Regulatory Board (LTFRB).
Nairaman a benepisiario dagiti drayber ti Grab, Utol, Toktok, Pure Ride, Maxim, Joyride, InDrive, Hirna, Go Cab, Angcars, Unlala, Hail, PeekUp, ken Para Express.
Immunan a naikkan dagiti drayber ti traysikel idi Marso 17.
Araw ng Kagitingan, rinambakan ti LGU Narvacan iti Junction War Memorial
Impanamnama ni Domagoso kadagiti Manileño nga awan ti mailaksid bayat ti panangsaranget ti pagilian iti nadagsen nga epekto ti gubat iti Middle East, idinto nga insaganadan dagiti programa a mangtulong kadagiti naapektaran iti daytoy.
Malaksid iti fuel subsidy, adda insagana ti gobierno ti Siudad ti Manila a ₱1.76 a bilion a stimulus package, a direkta a mangipaay iti kuarta kadagiti umili tapno agtalinaed ti panaggaraw ti ekonomia kabayatan ti agtultuloy a panagngato dagiti presio a manglapped iti badiet ti pamilia.
Addanto pay maited a kanayonan a tulong kadagiti agtrabtrabaho iti public sector, kas iti para iti edukasion ken insentiba. (Patrick Garcia/Manila Bulletin//Lito Hilidon/Bannawag)
