Iti umuna a gundaway iti las-ud ti uppat a dekada ti Balikatan Exercises, makipaset dagiti soldado ti Japan iti kalatakan a panagsanay dagiti kameng ti Armed Forces of the Philippines (AFP) ken militar ti Estados Unidos (US), a tanda ti dakkel a panagbaliw iti pannakikadua para iti depensa ti pagilian kadagiti kaaliado a pagilian iti baet ti rumrumsua a pangta iti seguridad iti rehion.
Segun ken ni AFP Chief of Staff General Romeo Brawner Jr., mangibaon ti Japan iti puersada manipud iti Japan Self-Defense Forces (JSDF) a makipaset kadagiti panagsanay, ket saanda laeng nga agpalpaliiw kas kadagiti napalpalabas a tawen.
Ngem saan a nangted ni Brawner iti ad-adu pay a detalye kas iti kaadu ti dumar-ay, ania a yunit, wenno alikamen ti makipaset ngem kinunana nga ad-adu ti ipatulod ti Japan ita a tawen.
Ti Balikatan Exercise ti pundasion ti tulag ti depensa ti Filipinas ken US.
Maangay ti Balikatan Exercise ita a tawen manipud Abril agingga Mayo, a manglukat inton Abril 20.
Dati a sekretario ti DILG Sarmiento, nadutokan a baro nga adviser ti OPAPRU
Innayon ni Brawner nga iti laksid ti gubat iti Middle East, agtultuloy latta ti panagsanayda. (Martin Sadongdong/Manila Bulletin//Lito Hilidon/Bannawag)
