Linagip ti LGU Santa, Ilocos Sur idi Marso 19, 2026 ti Maika-295 nga anibersario ti pannakayanak ni Maria Josefa Gabriela Carino Silang babaen iti maysa a programa nga inatendaran dagiti opisial ti gobierno probinsial ti Ilocos Sur, National Police Commission, ken Philippine National Police a kas panangsaludar iti kinabannuarna ken kas panangrambak metten iti Marso a kas 2026 National Women's Month.
Naangay ti pannakaisagut ti korona iti Gabriela Silang Park iti Poblacion, Brgy. Magsaysay District, Santa a nakaimuntaran ti munumento ni Gabriela a nakasakay iti kabalio. Naiwayat ti programa babaen ti LGU Santa, iti panangidaulo ni Municipal Mayor Atty. Jeremy Jesus DP Bueno III.
Nagpaay a naisangayan a sangaili ni Bokal Fayinna Pilar S. Zaragoza-Delgado. Immatendar pay da Atty. Japheth B. Maningding, NAPOLCOM Provincial Officer; Atty. Jannah G. Singson, MPM, Ilocos Sur; dagiti kameng ti Ilocos Sur Provincial Police Office nga idauluan ni Provincial Director PCol. Agosto M. Asuncion a binayabay ni Capt. Rovic Nelmida, hepe ti polisia ti Santa; dagiti kameng ti Sangguniang Bayan ti Santa nga idauluan ni Bise Mayor Jesus B. Bueno, Jr., dagiti kapitan ti barangay ken dagiti nadumaduma nga school heads ken empleado ti gobierno lokal.
Iti programa, naibasa ti pakasaritaan ti biag ni Gabriela Siang, sa naiwayat ti 21-gun salute ken nagsarita da Bise Mayor Jesus Bueno Jr., Mayor JJ Bueno III, ken Bokal Fayinna Zaragoza-Delgado.
Ni Gabriela Silang ti maibilang a kaunaan a babai a heneral iti pakasaritaan ti pagilian. Naipasngay iti Caniogan, Santa idi Marso 19, 1731 ken nabitay idi Septiembre 20, 1763 kalpasan ti pannakakemmegna babaen dagiti Kastila iti panangidaulona iti yaalsa iti Kailokuan idi mapapatay ni Diego Silang nga asawana. (MARILYN C. CONTILLO)
