Imbilin ti Committee on Justice ti Kamara ita nga aldaw, Marso 25, ti pannakaipaulog ti subpoena tapno mairugin ti panangtamingda iti kaso nga impeachment kontra ken ni Bise Presidente Sara Duterte.
Kangrunaan kadagitoy ti subpoena duces tecum ken ad testificandum para ken ni Ramil Lagunoy Madriaga, a nagkuna a nagpaay a kas bagman ni Duterte.
Nakaditenar ita ni Madriaga, a dati nga intelligence officer ti administrasion ti Duterte, iti Bureau of Jail Management and Penology (BJMP) iti Taguig City.
Gapu daytoy iti inmosion ni Senior Deputy Minority Leader Mamamayang Liberal (ML) Party-list Rep. Leila de Lima iti naangay nga umuna a hearing ita nga aldaw. Inanamongan ni Committee Chairperson Batangas 2nd district Rep. Gerville Luistro ti mosion ni De Lima.
Segun ken ni De Lima, masapul a paayabanda ni Madriaga tapno agtestigo iti maar-aramid a hearing tapno mairuar ken mapatalgedanna ti apidabitna idi Nobiembre 29, 2025 a paset ti Annex A ti impeachment complaint nga impila ni Saballa.
Dati a sekretario ti DILG Sarmiento, nadutokan a baro nga adviser ti OPAPRU
Segun ken ni Luistro, ekspektarenda ti idadar-ay ni Madriaga iti sumaruno a hearing inton Abril 14.
Pinatgan met ti komite ti mosion ni Akbayan Party-list Rep. Chel Diokno a maipasidong ni Madriaga iti kustodia ti komite.
Maikkan met iti subpoena ti National Bureau of Investigation (NBI) mainaig iti rekordda iti maipagarup a panangpangta ni Duterte kontra ken ni Presidente Marcos, First Lady Liza Araneta-Marcos, ken dati a House Speaker Leyte 1st district Rep. Martin Romualdez idi Nobiembre 2024.
Dagiti maipagarup a death threat ti maysa kadagiti kapigsaan a kaso kontra ken ni Duterte, a nairaman pay iti immuna a kasona nga impeachment idi 2025.
Maikkan iti subpoena duces tecum ti Office of the Ombudsman tapno iruarda dagiti kopia ti statements of assets, liabilities, and net worth (SALN) ni Duterte manipud 2007 agingga iti 2013, 2016 agingga iti 2022, ken 2022 agingga iti 2025, gapu iti alegasion ti di mailawlawag a kinabaknang. (Ellson Quismorio/Manila Bulletin//Lito Hilidon/Bannawag)
