Impasigurado ti Malacañang kadagiti umili nga aramiden ti gobierno ti amin, iti beddeng ti linteg, tapno mapalag-an dagiti epekto a patauden ti agtultuloy a krisis iti Middle East.
Dayta ti impasingked ni Palace Press Officer ken Communications Undersecretary Claire Castro iti maysa a briefing idi Huebes, Marso 26 idi napagsaludsodan no kasano a tamingen ti gobierno ti krisis ta kunana a saan a sakup ti gobierno dagiti agtagtagilako iti lana.
"Saan met ngarud a mabalin nga agtignaytayo ngem aglabsingtayo met iti linteg. Isu a no ania laeng dagiti mabalin nga aramiden ti gobierno tapno mapalag-anantayo iti indateng daytoy a krisis iti Middle East, isu laeng ti isayangkattayo,” kinuna ni Castro.
Idi Mierkoles, pinirmaan ni Marcos ti Republic Act (RA) No. 12316 a mangted kenkuana iti emergency powers a mangsuspende wenno mangkissay iti excise tax kadagiti produkto a petroleo.
Segun ken ni Castro, madama pay laeng nga ad-adalen ti gobierno no mano ti nasayaat a maikissay no pilien ti Presidente a kissayan ti excise tax kadagiti produkto a petroleo.
Dati a sekretario ti DILG Sarmiento, nadutokan a baro nga adviser ti OPAPRU
“Reprepasuenda daytoy gapu ta agbaliwbaliw ti presio ti lana," kinuna ni Castro.
Kas kadagiti dadduma a linteg, addaan ti nadakamat a linteg a mangted ken ni Presidente Marcos iti emercency powers iti 15 nga aldaw a grace period kas maitunos iti Artikulo 2 ti Civil Code. Innayon ni Castro nga isu daytoy ti gagangay a grace period sakbay a maaddaan bileg wenno maipatungpal ti maysa a linteg.
"Ito po ay para sa sinasabi nating right to due process para lahat ng stakeholders, lahat ng mga kababayan natin, lahat ng taong involved, ay malaman… dahil alam naman natin kapag ito ay na-publish," inlawlawag ni Castro. "It will be considered as an information or a notice to the whole world. So, para sila ay makapagbasa, maintindihan, makapag-assess at makapag-prepare.”
Kuna ni Castro a kabayatan dayta a 15 nga aldaw a grace period, maipaayanda iti gundaway a mangikeddeng no ania dagiti tignay a mabalinda nga aramiden. Innayonna a Kongreso laeng ti mabalin a mangbaliw iti dayta a 15 nga aldaw a grace period isu a saan a masakupan ti turay ti Presidente.
Nadakamatna met ti singasing ni dati a hepe ti ekonomia Winnie Monsod a mangbuis kadagiti nabaknang imbes a maideklara ti national energy emergency.
"Ang sabi nga po ng Pangulo, ‘Nothing is off the table.’ So lahat po ng suhestiyon ay kinukonsidera," kinuna ni Castro.
(Betheena Unite/Manila Bulletin)
