Indatag dagiti grupo ti abogado ti Petition for Certiorari and Prohibition iti Korte Suprema (SC) idi Marso 27, tapno lapdanda ti House Committee on Justice iti ar-aramidenda mainaig iti impeachment complaint a maibusor ken ni Bise Presidente Sara Duterte.
Kiniddaw ni abogado Israelito P. Torreon iti SC a mangipaulog iti Temporary Restraining Order (TRO) ken Writ of Preliminary Injunction kontra iti komite ken iti Kamara tapno maisardeng ti panangtamingda iti impeachment complaint, agraman dagiti hearing, deliberasion, wenno panagbobotos a mainaig kadagitoy.
Mairaman kadagiti nagpetision da Vic Rodriguez, Rescie Angelli Rizada-Nolasco, Martin Delgra III, Wendel Avisado, James Patrick Bondoc, Raul Lambino, Luna Maria Acosta-Manlitoc, Jesus Hinlo Jr., ken Dr. Richard Mata.
Segun kadagiti nagpetision, adda naaramid ti komite iti serioso nga abuse of discretion amounting to a lack or excess of jurisdiction, gapu iti panangipalubosda a maisayangkat ti impeachment complaint iti laksid ti panaglabsing daytoy iti proseso ken linteg.
Nupay bigbigen dagati nagpetision a ti laeng Kamara ti addaan iti bileg a mangiwayat iti proseso ti impeachment, kunada nga adda pagpatinggaan daytoy a bileg.
Dati a sekretario ti DILG Sarmiento, nadutokan a baro nga adviser ti OPAPRU
Kas masursurat daytoy, saan pay a nagtignay ti Korte Suprema mainaig iti naidatag a petision, kasta met mainaig iti pannakaipaulog iti TRO. (Ivy Tejano/Manila Bulletin//Lito Hilidon/Bannawag)
