Nagtitipon idi Abril 12 iti The Club Filipino iti Siudad ti San Juan dagiti grupo ti pasurot ti dati nga administrasion ti Duterte ken ni Bise Presidente Sara Duterte tapno pormal a buklenda ti Reform Alliance for Good Governance (RAGE) Coalition.
Buklen ti RAGE Coalition dagiti nadumaduma a grupo kas iti Partido Reporma ni Davao del Norte 1st district Rep. Pantaleon Alvarez, Reform PH ni Mike Defensor, ken ti Partido Demokratiko ng Pilipinas-Lakas ng Bayan (PDP–Laban) ni Acting Davao City Mayor Sebastian "Baste" Duterte.
Nadutokan ni Acting Mayor Duterte a kas baro a party president ti PDP-Laban sakbay ti pannakabukel ti RAGE Coalition iti dayta met laeng nga aldaw.
Dimmar-ay iti taripnong da Senador Robinhood “Robin” Padilla ken Christopher “Bong” Go, dati a kongresman Mike Defensor, Batangas 1st District Rep. Leandro Legarda Leviste, dati a House speaker Pantaleon “Bebot” Alvarez, ken dati nga executive secretary Vic Rodriguez.
Nabukel ti RAGE Coalition kasanguanan ti pannakairugi ti hearing ti Committee on Justice ti Kamara iti kaso nga impeachment kontra ken ni VP Duterte, a manamnama a dar-ayan ni Ramil Madriaga, inton Abril 14. (Hannah L. Torregoza/Manila Bulletin//Lito Hilidon/Bannawag)
