Nakalalagip ti panangrambak ti LGU Narvacan iti Araw ng Kagitingan idi Abril 6, 2026 ta naiwayat a mismo iti Philippine –American–Japanese Friendship War Memorial iti Junction, Quinarayan, Narvacan, Ilocos Sur. Naisagutan iti sabong ti memorial a nakaimuntaran ti monumento dagiti soldado a Filipino, Amerikano, ken Hapones babaen kada Mayor Edna Cabalo-Sanidad, DMD; Bise Mayor Margarito A. Tejada; Col. Agosto M. Asuncion; Provincial Director ti Ilocos Sur Provincial Police Office, Colonel Bartolome Santiago; Veterans Federation of the Philippines 2nd District Commander, VFP Narvacan Post Commander Dominador Liberato; PVAO Vigan Office Chief Vicky Antiporda; General Loreto Rirao, AFP (Ret.); Capt. Jumar Castro, COP Narvacan MPS; ken dagiti kameng ti Sangguniang Bayan ti Narvacan a pakairamanan da SBM Gina Cordero, SBM Luis Charles Singson, SBM Mark Jun Tejada, SBM Michael Velasco, SBM Teofilo Cabreros, SBM Benjamin Dela Cuadra, ken SBM Satok Corrales, ABC Pres. Fidel Cacas, ken dagiti opisial ti Barangay Quinarayan nga idauluan ni Brgy. Capt. Larence Tejada ken dagiti beterano manipud iti Phil. Constabulary, Phil. Army, Phil. Marines, ken PNP.
Iti nasao nga okasion, impaayan ti LGU Narvacan iti Plake ti Pammigbig ken SB Resolutions dagiti tallo a nabatbati a beterano iti Narvacan, da Platon Javier, agtawen iti 104, tubo ti Codoog, ken nakiranget iti Bessang Pass; Vicente C. Cabello, 101, ti Barangay Cagayungan; ken Rosa Colis de Peralta, 96, tubo ti Camarao. Kinuyog ida dagiti kameng ti pamiliada iti panangawatda iti pammigbig.
Ti pannakaangay ti selebrasion iti Araw ng Kagitingian iti War Memorial nabalabala babaen ti PVAO, VFP, PNP, ken LGU Narvacan. Maipalagip a nabangon ti War Memorial idi panawen ni Mayor Pablito V. Sanidad babaen ti tulong ti Provincial Government of Ilocos Sur tapno mataginayon iti lagip ti kinahistorikal ti disso a maaw-awagan iti “Nagsangalan” a nakapasamakan ti nadara a ranget idi WWII idi sunsonen dagiti soldado nga Amerikano ken Filipino dagiti Hapones iti panagsanudda iti Cordillera agingga iti isusukoda. (ELISEO B. CONTILLO)
