Binalusingsing ni Ramil Madriaga dagiti alegasion a binusbos ni Bise Presidente Sara Duterte ti ₱125 a milion a balor ti confidential fund ti Office of the Vice President (OVP) iti las-ud ti 11 nga aldaw.
Ni Madriaga, a nagkuna a dati isuna a bagman ni VP Duterte idi nagpaay daytoy a sekretario ti DepEd, ti maibilang a kangrunaan a testigo iti kaso nga impeachment kontra ken ni Duterte.
Iti panagtestimoniar ni Madriaga iti impeachment hearing nga inangay ti Committee on Justice ti Kamara idi Abril 14, kinunana a saan a pudno a binusbos ni Duterte ti confidential fund ti OVP idi 2022 iti las-ud ti 11 nga aldaw, no di ket nabusbos ti pondo iti las-ud ti di nababbaba ngem 24 nga oras laeng.
Binasa ni Madriaga ti 24 a panid a supplemental affidavit-na a naglaon iti detalye dagiti mapapati a transaksion ni Duterte, ken ti nagbalin nga akemna a mangitulod iti kuarta kadagiti nadumaduma a tao.
Iti isu met lang nga apidabit, imbutaktak ni Madriaga ti maipagarup a gandat ti kampo ni Duterte a destabilisasion tapno isu ti sumukat ken ni Presidente Marcos Jr. iti katengngaan ti terminona.
Mayo 27, naideklarar a regular holiday para iti Eid’l Adha
Segun ken ni Madriaga, kalpasan a nagsapata ni Sara a kas bise presidente, nakipatang ni dati a presidente Rodrigo Duterte kadagiti retirado a heneral ti Armed Forces of the Philippines, ket adda isuna (Madriaga) sadiay idi, mainaig kadagiti amin a mabalin a pamuspusan tapno mapaikkat ni Marcos a kas presidente iti 2025, kas iti aggigiddan a panaglusulos dagiti opisial ti gobierno, civil disobedience, panangraut iti Malakanyang, agraman panangpapatay (assassination).
Iti sabali a bangir, kinuna ni Salvador Panelo Jr., abogado ni VP Duterte, a nakapuy a testigo ni Madriaga ket saanna a nabalusingsing ti nabatad ken natibker nga ebidensia nga indatagda iti kaso a perjury nga impilada kontra ken ni Madriaga. (Ellson Quismoro/Manila Bulletin//Lito Hilidon/Bannawag)
