Nadutokan a kas baro a National Security Adviser (NSA) ni dati a hepe ti Armed Forces of the Philippines (AFP) Eduardo Oban Jr., kalpasan nga inawat ni Presidente Marcos Jr. ti panaglusulos ni NSA Eduardo Año iti akemna.
Iti naangay a press briefing idi Marso 15, kinuna ni undersecretary ti Presidential Communications Office (PCO) Claire Castro nga inkeddeng ni Año nga agretiron iti serbisio kalpasan ti adu a dekada a panagserbina iti gobierno ken iti militar.
Nagyaman ti Malakanyang kadagiti naitulong ken nagapuanan ni Año iti pannakapatibker iti seguridad ti pagilian ken iti panangsiguradona iti panagtitinnulong dagiti adda tii sektor ti seguridad iti baet ti lumanlanlan a parikut iti rehion ken iti sangalubongan.
Ni Oban ti dinutokan ni Marcos a suno ni Año.
Nagpaay ni Oban a kas Chief of Staff ti AFP ken kameng ti Philippine Military Academy Class of 1979.
Sen. Dela Rosa, rimmuar kalpasan ti panagpipinnaltog iti pasdek ti Senado; Sen. Padilla, mapapati a nangiruar ken ni Dela Rosa
Nagakem ni Oban kadagiti kangrunaan a pagsaadan, a pakairamanan ti Deputy Chief of Staff for Plans (J5).
Segun ken ni Castro, naruay ti padas ni Oban iti operasion ti militar, panagplano iti depensa, ken nailian a seguridad. Indauluanna met ti Visiting Forces Agreement Commission.
Agtalek ni Marcos iti kabaelan ni Oban a mangiwardas iti panangsalaknib iti seguridad ti pagilian. (Argyll Cyrus Geducos/Manila Bulletin//Lito Hilidon/Bannawag)
