Impaganetget ti Ilongga vlogger a ni Iloy Bugris: The Queen of Revelations ti pammatina a natayen ni Presidente Marcos Jr. ket maysa laeng a body double ti agparparang ita a presidente.
"Saanak latta a mamati a sibibiag ti Presidente," kuna ni Iloy Bugris iti pananginterbiu kenkuana ti RMN Iloilo idi Abril 16.
Naaramid ti interbiu kalpasan nga inrekomendar ti Presidential Communications Office (PCO) iti Department of Justice (DOJ) nga imbestigarenda ni Iloy Bugris ken dagiti dua pay a social media personality gapu iti mapapati a panangiwarasda iti palso nga impormasion mainaig iti salun-at ni Marcos.
Segun ken ni Iloy Bugris, a napinget a pasurot ni Bise Presidente Sara Duterte, paset isuna ti maysa a sekreto a chat group nga agkunkuna nga iggemda ti dokumento a mangipakpakita iti pudno a kasasaad ti salun-at ti presidente.
Jinky Miraflores Carpio ti pudno a nagan ni Iloy Bugris a tubo ti Iloilo City ken aggigian iti United Arab Emirates, ken adu a kaso a kriminal ti sangsanguenna. (Tara Yap/Manila Bulletin//Lito Hilidon/Bannawag)
