Pabilgen ti Philippine Army (PA) ti kabaelanda a mangsalaknib iti teritorio ti pagilian babaen ti pannakipasetda iti live-fire exercise a mangusar iti M142 High Mobility Artillery Rocket System (HIMARS) iti Exercise Salaknib nga isayangkat ti Estados Unidos.
Ti HIMARS ket maysa a long-range ken multiple-launch rocket system nga armas a maisulbong iti lima a tonelada ti kadagsenna a trak, ket nausar ti reduced range practice rockets (RRPR) bayat ti panagsanayda.
Pinadas dagiti kameng ti PA Artillery Regiment ken ti US Army Pacific (USARPAC) 25th Infantry Division daytoy nga armas idi Abril 16 iti Canantong, Laur, Nueva Ecija.
Segun ken ni panakangiwat ti PA Col. Louie Dema-ala, ti panagsanayda a mangusar iti RRPR ket paset ti annongenda a responsable ken natalged a pannakausar daytoy nga igam.
Makipaset met ti dadduma a pay a pagilian kas iti Japan Ground Self-Defense Force ken ti Australian Army.
KLASIKO A SARITA: Panagsapul iti Pagtaengan (2)
Malaksid iti Salaknib, isagsaganaan met ti Armed Forces of the Philippines (AFP) ti Exercise Balikatan, ti kadakkelan a tinawen a panagsanay ti militar iti Estados Unidos. Nasurok a 17,000 a soldado ti AFP ken manipud iti US, Australia, New Zealand, Japan, France, ken Canada ti makipaset iti daytoy a panagsanay manipud Abril 20 agingga Mayo 8. (Martin Sadongdong/Manila Bulletin//Lito Hilidon//Bannawag)
