Kalpasan ti sumagmamano a bulan a pananglikliklikna kadagiti autoridad, naarestar met laeng ni dati a kongresman Zaldy Co iti Prague, Czech Republic idi pinanggepna ti sumrek sadiay nga awan umno a dokumento nga iggemna.
Daytoy ti inwaragawag ni Presidente Marcos Jr. iti maysa a paskil iti Facebook idi rabii ti Abril 16.
Segun ken ni Marcos, nakadetinar ni Co ken addan iti kustodia ti autoridad ti Czech Republic.
Makium-uman ti gobierno ti Filipinas iti Czech Republic mainaig iti pannakapasubli ni Co iti pagilian.
Pimmanaw ni Co iti pagilian idi Hulio itay napan a tawen iti baet ti pannakaibutaktak dagiti anomalia iti flood control project, sa naglusulos iti Kamara idi Septiembre 2025.
Pannakaipaay iti ayuda, pagyanan dagiti biktima ti uram iti Parola, impasigurado ni Presidente Marcos
Naideklarar ni Co a kas pugante gapu ta saan a nagparang iti Sandiganbayan a nangipaulog iti warrant of arrest kontra kenkuana ken kadagiti dadduma pay a padana a naidarum gapu iti mapapati a panagkunniber iti proyekto a dike iti Naujan, Oriental Mindoro. (Argyll Cyrus Geducos/Manila Bulletin//Lito Hilidon/Bannawag)
