Imbilin ni Presidente Marcos Jr. ti temporario a pannakasuspenso ti excise tax ti liquefied petroleum gas (LPG) ken kerosene (gaas) iti las-ud ti tallo a bulan tapno maep-ep ti epekto ti ingingina ti presio ti lana a pinataud ti krisis iti enerhia.
Naipaulog daytoy babaen ti bileg ti Executive Order (EO) No. 114, a pinirmaan ni Marcos idi Abril 16, kas inrekomendar ti Development Budget Coordination Committee (DBCC).
Ngem saan a nairaman a masuspenso ti LPG a maus-usar kas raw material para iti panagpataud iti petrochemical wenno kas gasolina para kadagiti lugan, kasta met ti kerosene a mausar a kas gasolina ti eroplano.
Segun iti EO No 114, binulan a repasuen ti DBCC ti pannakasuspenso dagiti nadakamat a produkto ti lana.
Ti Department of Energy (DOE) ken ti Department of Finance (DOF), babaen ti Bureau of Internal Revenue (BIR) ken Bureau of Customs (BOC), ti napusgan a mangbantay iti pannakaipatungpal ti direktiba.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Nabilin ti BIR ken BOC a mangisubmiter iti binulan a report iti Kongreso mainaig iti kaadu ken naideklarar a balor dagiti produkto ti petroleo a dinakamat ti EO No. 114.
Babaen ti bileg ti Republic Act No. 12316 a napirmaan itay nabiit, naikkan ni Marcos iti autoridad a mangsuspenso wenno mangkissay iti excise tax ti produkto a petroleo agingga laeng iti tallo a bulan tunggal insidente, ket maikkan iti pawayway nga agingga iti makatawen, segun iti agdama a situasion. (Argyll Cyrus Geducos/Manila Bulletin//Lito Hilidon/Bannawag)
