Marugian ti kadakkelan nga Exercise Balikatan ita nga aldaw, Abril 20, a dar-ayan ti 17,000 a soldado ti Armed Forces of the Philippines (AFP) ken dagiti kakaduada manipud iti Estados Unidos ken lima pay a pagilian a makipaset iti napasaknap a war games a nairanta a mangpadas iti moderno a kabaelan iti panangdepensa iti daga, tangatang, taaw, agraman iti internet.
Maangay ti panglukat a seremonia iti Camp Aguinaldo iti Siudad ti Quezon a mabaliwan manipud iti gagangay a panagsanay ket agbalin nga "all-domain operations,” segun ken ni panakangiwat ti AFP Col. Francel Margareth Padilla.
Makipaset dagiti pagilian ti Japan, Australia, Canada, New Zealand, ken France, agraman dagiti 17 a dadduma pay a pagilian nga agpaliiw iti maika-41 a panagsanay ti Exercise Balikatan.
Segun ken ni US Col. Robert Bunn, pannakangiwat ti Balikatan ti US, naaramid ti panagsanay a mangrisut kadagiti makalapped a banag iti teknikal ken iti aspekto ti tao.
Naisayangkat ti nasaksaknap a panagsanay iti baet ti kumarkaro a risiris iti West Philippine Sea (WPS), ken nairana iti maika-10 nga anibersario ti 2016 arbitral ruling a nangilaksid iti panangtagtagikua ti China iti WPS. (Martin Sadongdong/Manila Bulletin//Lito Hilidon/Bannawag)
