Leppasen ti Committee on Justice ti Kamara ti panangbistada iti kaso nga impeachment a maibusor ken ni Bise Presidente Sara Duterte inton Abril 29.
Daytoy ti kinuna ni House Assistant Majority Leader Lanao del Sur 1st district Rep. Zia Alonto Adiong, kameng ti Committee on Justice, iti maysa nga interbiu idi Abril 19.
Ngem sakbay daytoy, ituloy ti komite ti panangbistada iti kaso nga impeachment inton Abril 22.
Mairaman kadagiti alegasion iti kaso nga impeachment ti panangpangta ni Duterte iti nangato nga opisial ti gobierno, saan nga umisu a pannakausar ti confidential funds, di mailawalawag a kinabaknang, ken panagduma iti Statements of Assets, Liabilities and Net Worth (SALN).
Segun ken ni Adiong, mabalin a mayawat ti committee report iti plenario ti Kamara apaman a marugian ti sesionda inton Mayo 4, a no maanamongan, mayallatiw daytoy iti Senado nga agpaay a kas impeachment court. (Ellson Quismorio/Manila Bulletin//Lito Hilidon/Bannawag)
