Dinayaw dagiti kongresman ti agparparang a pannakaisubli ti panagtalek ti publiko iti liderato ni Presidente Marcos Jr. bayat ti maibilang a narikut unay a paset ti panawen iti politika.
Dinakamat da House Deputy Speaker Zambales 1st district Rep. Jay Khonghun ken La Union 1st district Rep. Paolo Ortega V ti resulta ti first quarter (Q1) survey nga insayangkat ti OCTA Research 2026, a nangipakita nga agsubsublin ti panagtalek ti umili iti ar-aramiden ni Marcos iti laksid ti panagbaba ti panagtalek ti publiko kadagiti tao ti aglawlawna.
Naipablaak ti resulta ti surbey ti OCTA Research idi Abril 21 a nangipakita iti panagngato ti trust rating ni Marcos a manipud 48 a porsiento idi maudi a paset ti 2025, ket nagbalin a 54 a porsiento iti first quarter ti 2026.
Ngimmato met ti performance rating ni Marcos manipud 51 a porsiento, nagbalin a 55 a porsiento iti napalabas a quarter.
Segun ken ni Ortega, makitkita ti publiko dagiti ar-aramiden a panangiwardas ti presidente, ket marikna dagiti adda iti baba ti gimong dagitoy.
Sen. Dela Rosa, makemmeg no gandatenna ti rummuar iti pagilian; immigration lookout bulletin, naipaulog
Naisayangkat ti surbey iti entero a pagilian manipud Marso 19 agingga Marso 25 babaen ti rupanrupa nga interbiu kadagiti 1,200 a respondent nga agtawen iti 18 agpangato.
Dinakamat ni Ortega ti pannakasuspenso ti excise tax ti liquefied petroleum gas (LPG) a manamnama a dakkel ti maitulongna kadagiti minilion a pamilia.
Segun iti OCTA, daytoy nga ingangato iti panagtalek ken grado ti nagapuanan ni Marcos, a buyogen ti bimmaba a grado ti panagduadua ti publiko, ti mangipakita iti panirigan dagiti umili iti liderato ni Marcos. (Ellson Quismorio/Manila Bulletin//Lito Hilidon/Bannawag)
