Ibilang ni dati a presidente Rodrigo Duterte ti bagina a kas “invictus” wenno "saan a maparmek" kasanguanan ti panagurayna iti pannakaipaulog ti kangrunaan a pangngeddeng ti International Criminal Court (ICC).
Daytoy ti balikas a mangiladawan iti agdama a kasasaad ti panunot ni Duterte, segun iti anakna a ni Veronica “Kitty” Duterte kalpasan ti panangsarungkarna iti amana iti ICC detention facility idi Abril 21, bayat ti panagurayda iti desision ti Appeals Chamber mainaig iti apelarda iti hurisdiksion ti ICC.
Segun ken ni Kitty, natalged ti kasasaad ti salun-at ti amana ken mairuruamen iti biag iti detention, ken adda daytoy iti nasayaat a panangaywan.
Nupay kasta, kuna ni Kitty a saanda a pagsasaritaan ti maipanggep iti kaso ti amana no sarsarungkaranda daytoy.
Sangsanguen ni dati a presidente Duterte ti kaso a crimes against humanity, agraman panangpapatay ken gandat a panangpapatay, mainaig iti insayangkatna nga anti-drug campaign idi nagakem a presidente.
255 a kongresman, immanamong iti kaso nga impeachment kontra ken ni VP Duterte
Manamnama nga ipaulog ti Appeals Chamber ti ICC ita nga aldaw, Abril 22, ti desisionda mainaig hurisdiksion ti ICC iti kasona, a mangitunda iti sumaruno nga addang ti ICC iti kaso. (Argyll Cyrus Geducos/Manila Bulletin//Lito Hilidon/Bannawag)
