Nagkiddaw ti Office of the Ombudsman iti Sandiganbayan a mangipaulog koma iti precautionary hold departure order (PHDO) tapno malapdan ti ipapanaw ni dati a House Speaker Martin Romualdez iti pagilian, bayat a maur-uray ti resulta ti imbestigasionda mainaig iti kaso a plunder ken money laundering.
Naipila ti kiddaw a pannakaipaulog ti PHDO iti seventh division ti Sandiganbayan idi Abril 21.
Maysa a pammilin ti PHDO nga ipaulog ti korte a manglapped iti iruruar iti pagilian dagiti naidarum iti kaso a kriminal nga im-imbestigaren ti Department of Justice (DOJ) wenno ti Office of the Ombudsman.
Iti pannakasursurat daytoy, di pay ammo no ania nga oras a naipila ti kiddaw, ken no addan aksion ti Sandiganbayan mainaig iti daytoy.
Idi Abril 6, inwaragawag ni Ombudsman Jesus Crispin Remulla a maidarum iti plunder da Romualdez ken dati a Senate president Francis Escudero iti Sandiganbayan inton Mayo gapu iti mapapati a pannakairamanda iti binilion a pisos ti balorna nga anomalia iti flood control project.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Iti naangay a press briefing, kinuna ni Remulla inyendorsodan iti Anti-Money Laundering Council (AMLC) ti freeze order kadagiti sanikua ni Romualdez gapu iti maipagarup a money laundering.
Gandat ni Romualdez a mapan koma agpa-check up iti Singapore idi Abril 21, ngem gapu ta adda naipaulog nga immigration lookout bulletin order (ILBO) kontra kenkuana, saan a pinalubosan ti Bureau of Immigration (BI) ti kiddawna.
Nupay kasta, adda report a pinatgan ti Kamara ti kiddaw a travel clearance ni Romualdez a mapan agpa-check up iti Singapore.
Segun iti abogado ni Romualdez a ni Ade Fajardo, saan a maparitan ni Romualdez a rummuar iti pagilian ta ILBO laeng ti naipaulog, a saan a manglapped iti panagbiahe iti ballasiw taaw, idinto a pinatgan ti Kamara ti kiddawna a travel authority. (Czarina Nicole Ong Ki/Manila Bulletin//Lito Hilidon/Bannawag)
