Mangipaay ti hustisia kadagiti naidarum ken maipagarup a biktima ti pangngeddeng ti International Criminal Court (ICC) a nangkompirmar kadagiti amin a kaso ni dati a presidente Rodrigo Duterte a crimes against humanity maipuon iti naisayangkat nga anti-drug war idi panagakemna.
Daytoy ti kinuna ti Malakanyang kalpasan nga ipaulog ti Pre-Trial Chamber 1 (PTC I) ti 50 a panid a pangngeddengda idi Abril 23 a nangpasingked iti kaso ni Duterte.
Iti maysa a text message, kinuna ni Presidential Communications Office (PCO) Undersecretary Claire Castro a raemen ti Malakanyang ti desision ti ICC, ket impaganetgetda a rummuarto ti kinapudno iti maaramid a pannakabista ti kaso ni Duterte.
Iti sabali a bangir, naragsak dagiti kameng ti minority bloc ti Kamara gapu iti daytoy a desision ti ICC.
Kuna ti minoria a ti pangngeddeng ti ICC ti mangipakita a saan a maibilang nga isolated incident laeng dagiti napasamak a pammapatay, ken masapul nga agsungbat dagiti adda iti poder.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Impaganetget ti grupo a masapul nga agtulid ti naanayas ken patas a pannakabista ti kaso nga awan ti manglapped, politikal a pannakibiang, wenno naranggas a tignay kontra kadagiti testigo, pamilia, ken mangitantandudo iti kalintegan ti tao. (Argyll Cyrus Geducos/Manila Bulletin//Lito Hilidon/Bannawag)
