Tinagibassit ni Senate President Pro Tempore Panfilo “Ping” Lacson idi Abril 26 ti posibilidad a mapataud ti “people power revolution” a suportaran ti militar iti baet dagiti kontrobersia a pakairamanan da Presidente Ferdinand “Bongbong” Marcos Jr. ken Bise Presidente Sara Duterte.
Iti maysa nga interbiu, kinuna ni Lacson, dati a hepe ti Philippine National Police (PNP), a saan nga agballigi ti kastoy a kita ti aramid, ta patienna a propesional dagiti kameng ti Armed Forces of the Philippines (AFP).
Segun ken ni Lacson, adda naawatna nga impormasion nga adda sumagmamano a retirado nga opisial ti AFP ti mangal-allukoy kadagiti aktibo a kameng ti militar a mangsuportar iti isayangkatda a panagalsa kontra iti gobierno nga idauluan ti militar.
Ngem kinuna ti nagtaudan ti impormasion ni Lacson nga awan ti pagilasinan nga agballigi dagitoy a tignay.
Idi napan a tawen, sinupiat ni Lacson ti kapanunotan a mangisayangkat iti kudeta iti baet ti panagrubrob ti pungtot ti publiko gapu kadagiti isyu ti panagkunniber, ket kunana a masapul nga agtalinaed ti pungtot ti publiko iti panagkunniber, ngem masapul a maraem latta ti Konstitusion. (Hannah L. Torregoza/Manila Bulletin//Lito Hilidon/Bannawag)
