Inyetnag ti Sandiganbayan Sixth Division idi Abril 27 ti precautionary hold departure order (PHDO) kontra kada Sen. Francis Escudero ken negosiante a Maynard Siy Ngu.
Binilin ti korte ti daulo ti Bureau of Immigration (BI) a lapdanda ti ania man a gandat dagiti dua a rummuar iti Filipinas ken mairaman ti naganda Hold Departure List ti ahensia.
Idi agsapa ti Abril 27, inangay ti Sandiganbayan ti hearing para iti petision nga impila ti Office of the Ombudsman a nagkiddaw iti pannakaipaulog ti PHDO kontra kada Escudero ken Ngu.
Maysa a pammilin ti korte ti PHDO tapno lapdan ti BI ti maysa a tao a rummuar iti pagilian bayat a nakapila ti kasona.
Im-imbestigaren ti Ombudsman da Escudero ken Ngu gapu iti mapapati a pannakairamanda iti naanomalia a flood control project. (Jel Santos/Manila Bulletin//Lito Hilidon/Bannawag)
