Kiniddaw ti Kamara iti Korte Suprema (SC) a mawaswas koma dagiti nakonsolidar a petision a mangpasardeng ti panangtaming ti Kamara iti kaso nga impeachment kontra ken ni Bise Presidente Sara Duterte.
Nagidatag iti komento dagiti abogado ti Office of the Solicitor General (OSG) a nangibagi iti Kamara ken iti Committee on Justice, kas pammilin ti SC idi Abril 8 mainaig iti petision nga impila ni Duterte ken ti bunggoy ni Israelito P. Torreon.
Nupay kasta, saan a nangipaulog ti SC iti temporary restraining order (TRO) idi Abril 8, a nanglapped koma iti isaysayangkat ti Kamara a hearing iti kaso nga impeachment ni Duterte.
Iti komento nga impila ti OSG, dinakamatda ti prinsipio ti "separation of powers" mainaig iti karbengan ti Kamara a mayannurot iti Konstitusion tapno makitada no umdas met laeng dagiti naipila nga impeachment complaint ken ti panangisayangkatda iti proseso ti impeachment.
Impaganetget ti OSG nga agtigtignay ti Committee on Justice ti Kamara kas mayannurot iti Konstitusion ken awan inaramidda a nakaro a panangabuso a mangitunda iti pannakaipakat ti judicial review ti SC.
Articles of Impeachment kontra ken ni VP Duterte, dimmanonen iti plenario ti Kamara
Dinakamat ti OSG ti pangngeddeng nga impaulog ti SC iti Enero 28, 2026 mainaig iti immuna a kaso nga impeachment ni Duterte idi napan a tawen, ken saanda nga inlaksid ti karbenganna iti due process, idinto nga inikkanda ti gundaway ni Duterte a mangipila iti Verified Answer-na ken inawisda pay a dumar-ay kadagiti hearing.
Inkalintegan ti OSG, a gapu iti panagkedked ni Duterte a dumar-ay iti hearing ti Committee on Justice, saanna ngarud mabalin nga ibaga a nailaksid ti karbenganna iti due process.
Saan pay nga ammo no tamingen ti SC ti pannakaipaulog ti TRO kalpasan a maawatda ti sungbat ti Kamara babaen ti OSG. (Manila Bulletin//Lito Hilidon/Bannawag)
