Agladladingit ti probinsia ti Ilocos Norte iti ipupusay ni Palarong Pambansa gold medalist Mark Dave Nicolas idi Abril 29.
Pimmusay ni Nicolas, tubo ti Piddig, iti tawenna a 18. Ita a masursurat daytoy a damag, saan pay a naibaga ti makaigapu iti ipapatayna.
"Kenka, naindaklan a Mark Dave, diak malipatan ti pannakakitak iti rupa ti inam idi binurakmo ti rekord iti mismo nga stadium-tayo idi Ilocos Norte Palarong Pambansa 2025, a sinangailitayo, ken ti napaut a panaginnarakupyo nga agina a nangtukay iti puspusomi," kinuna ni Ilocos Norte Vice Gov. Matthew Joseph Manotoc.
Tumaytayaktak ni Nicolas a kas maysa nga sprinter, nangruna iti napan a tawen a nangaramid iti baro a rekord iti imatang dagiti fans ti ilina idi 2025 Palarong Pambansa a naangay iti Siudad ti Laoag.
Dati nga estudiante ti Piddig National High School ni Nicolas, a nangyalat iti dua a balitok a medalia iti 400m ken 4x400 relay ken dua a silver medal iti 1500m ken 4x100 relay.
LGU ti Santa, Ilocos Sur, tumulong a mangpasayaat iti edukasion iti lokalidad
Malaksid iti inyalatna iti Palarong Pambansa, nakagun-od pay ni Nicolas iti silver medal iti 14th ASEAN Schools Games idi met laeng 2025.
Nakisalip met ni Nicolas iti Philippine Athletics Open.
Nagayus iti social media ti pannakipagladingit dagiti fans ken ti kagimongan ti track and field iti ipupusay ni Nicolas. (Leilanie Adriano/PNA//Lito Hilidon/Bannawag)
