Nakoronaan a kas Miss Universe Philippines 2026 ni Filipino-American Bea Millan-Windorski ti La Union.
Naangay ti koronasion iti Mall of Asia iti Siudad ti Pasay idi Mayo 2.
Iti rugi pay laeng ti pageant, adun ti mangayat ken ni Bea, ket ad-adda a pinagsiddaawna dagiti hurado iti sungbatna iti maudi a question-and-answer round.
Nasaludsod ken ni Bea: "Adun dagiti Filipino a maup-upay iti pagilian. Para kenka, apay a napateg latta nga ibagian ti Filipinas iti sangalubongan nga entablado?"
Insungbat ni Bea: "Ti Filipinas ti maysa a banag ken lugar nga inay-ayatkon iti entero a biagko. Nupay dimmakkelak iti paset ti Estados Unidos a kaaduanna a saan a nadumaduma ti agindeg, nabigbigdak a kas Filipina kangrunaan ti amin. Masapul pay nga itudok ti yan ti Filipinas iti mapa kadagiti gagayyemko, ngem adda latta nauneg a riknak a pasetak dayta a lugar ken pagtaengak. Pinilik a bungonen ti biagko iti balikbayan box ken maleta ta patiek ti awan patinggana a kabaelan dagiti Filipino. Ken ti kinapudno a masapul a mangparnuaytayo kadagiti panggedan ditoy, tapno saanen a nasken a mapan iti ballasiw-taaw dagiti Filipino ken maisina kadagiti pamiliada tapno laeng agbiag ken rumang-ayda. Ket no maikkanak iti gundaway nga agbalin a Miss Universe Philippines, ikarik a pagserbiak ti isu amin."
255 a kongresman, immanamong iti kaso nga impeachment kontra ken ni VP Duterte
Dimmakkel ni Bea iti Wisconsin, idinto a tubo ti La Union ti pamiliana nga immakar iti Estados Unidos. Ngem napigsa latta ti darana a Filipina nupay sadiay ti dimmakkelanna.
Idi 2026, opisial a napili ni Bea a mangibagi iti La Union iti salip ti Miss Universe Philippines, ket daytoy a panagsublina iti puonna ti nangitunda iti panagbaliw ti karerana.
Ni Bea itan ti mangibagi iti Filipinas para iti Miss Universe 2026 a maangay iti Puerto Rico itoy a tawen. (Neil Ramos/Carissa Alcantara/Manila Bulletin//Lito Hilidon/Bannawag)
