Imbilin ni Presidente Marcos Jr. ti nadaras a pannakaipaay ti tulong kadagiti lugar a naapektaran ti panagbettak ti Bulkan Mayon, kangrunaan iti Guinobatan ken Camalig, Albay.
Segun iti Malakanyang, naisayangkaten dagiti response operation tapno masalakniban ti salun-at ken kinatalged ti publiko, ken agtalinaed a silulukat dagiti kalsada ken kangrunaan a serbisio kadagti naapektaran a lugar.
Binilin ni Marcos dagiti autoridad a bantayanda a naimbag dagiti karayan ken pagnaan ti danum para iti posible a panagayus ti lahar, nangruna no agtudo iti napigsa.
Idadauluan ti Office of Civil Defense (OCD) ken ti National Disaster Risk Reduction and Management Council (NDRRMC) ti nainget a pannakaipatungpal ti panagbakuit tapno mailisi dagiti residente kadagiti napeggad a lugar
Agtalinaed ti Bulkan Mayon iti Alert Level 3 (High Level of Volcanic Unrest) kalpasan a nangiruar iti pyroclastic density currents (PDC) a nangpataud iti nasaknap a panagtennag ti dapo (ashfall) kadagiti sumagmamano nga ili ken iti siudad iti probinsia ti Albay, segun iti Philippine Institute of Volcanology and Seismology (Phivolcs).
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Segun iti Department of Social Welfare and Development (DSWD) idi Mayo 3, agdagupen iti 1,438 a pamilia (wenno 5,440 a tao) ti naipan kadagiti 14 nga evacuation center iti entero nga Albay. (Betheena Unite/Manila Bulletin//Lito Hilidon/Bannawag)
