Inanamongan dagiti amin a kameng ti Committee on Justice ti Kamara idi Mayo 4 ti report ti komite agraman ti articles of impeachment a maibusor ken ni Bise Presidente Sara Duterte.
Inaprobaran dagiti 55 a kameng ti komite nga idadauluan ni Batangas 2nd district Rep. Gerville Luistro ti report ti komite ken ti articles of impeachment a manamnama a mayendorso iti plenario iti sesion ti Kamara iti dayta met la a malem.
Pinagtipon ti komite dagiti dua nga impeachment complaint kontra ken ni Duterte ita a tawen a nangdakamat iti nadumaduma a mapapati nga inaramidna kas iti pananglabsing iti Konstitusion, panagpasuksok (bribery), panagkunniber, panangdadael iti panagtalek ti publiko, ken dadduma pay a nakaro a krimen.
Buklen ti articles of impeachment dagiti sumaganad:
1. Saan nga umisu a pannakausar ti confidential fund nga agdagup iti saan a nababbaba iti ₱500 a milion iti Office of the Vice President (OVP) ken ₱112.5 a milion iti Department of Education (DepEd)
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
2. Pannakaala iti saan a mailawlawag a kinabaknang ken saan a sibubukel a pannakaiparang dagiti sanikua iti statements of assets, liabilities, and net worth (SALN)
3. Panagpasuksok ken panagkunniber dagiti opisial nga adda iti babaenna
4. Panangallukoy wenno panagkiddaw iti naranggas nga aramid, agraman ti mapapati a panangipangta kadagiti nangato nga opisial ti gobierno.
5. Ar-aramid a mangdadael iti kinatalged ti gobierno ken panangabuso iti turay.
Kakatlo a botos (1/3) laeng dagiti kongresman ti kasapulan tapno adaptaren ti Kamara ti articles of impeachment, sa mayawat iti Senado nga agpaayto met a kas impeachment court. (Ellson Quismorio/Manila Bulletin//Lito Hilidon/Bannawag)
