Nayawaten iti Committee on Rules ti Kamara ti articles of impeachment kontra ken ni Bise Presidente Sara Duterte idi rabii ti Mayo 5, kalpasan a naibasa ti Committee Report (CR) No. 261 ti Committee on Justice nga indatag ni daulo ti komite Batangas 2nd district Rep. Gerville Luistro.
Linaon ti CR No. 261 ti uppat nga articles of impeachment a mapapati a nakabasolan ni VP Duterte.
Ni Deputy Speaker ken La Union 1st district Rep. Paolo Ortega V ti nangisponsor iti report ti komite tapno maidatag iti plenario ita nga aldaw, Mayo 6.
Segun ken ni Bicol Saro Party-list Rep. Terry Ridon, dandani 200 a kongresman manipud iti nadumaduma a partido ti nakasagana a mangsuportar iti pannakaanamong ti articles of impeachment ni Duterte.
Iti sabali a bangir, mapaspasangasangan nga adda panagbalbaliw dagiti puersa iti politika iti beddeng ti Kamara kasanguanan ti panagbobotosda inton Mayo 11.
ICC Prosecution, rugianda ti pannakabista iti kaso ni dati a presidente Duterte inton Nobiembre 30
Nanayonan ti 50 dagiti nagbalin a kameng ti National Unity Party (NUP) nga idadauluan ni Deputy Speaker Antipolo City 1st district Rep. Ronaldo "Ronnie" Puno; kasta met ti Partido Federal ng Pilipinas (PFP) nga idadauluan ni House Speaker Isabela 6th district Rep. Faustino "Bojie" Dy.
Dagiti kameng ti partido Lakas-Christian Muslim Democrats (Lakas-CMD) nga idadauluan ni Leyte 1st district Rep. Martin Romualdez ti kangrunaan a mangitantandudo iti kaso nga impeachment ni Duterte ita a tawen, ken iti napalabas.
Adda 100 a kongresman a kameng ti Lakas-CMD idi nangrugi ti 20th Congress.
Dua pay a dakkel a partido iti Kamara ti nanayonan ti kamengna: ti Nationalist People's Coalition (NPC) nga addaan 55 a kameng; ken ti Nacionalista Party (NP) nga addaan 35 a kamengda.(Ellson Quismorio/Manila Bulletin//Lito Hilidon/Bannawag)
