Kinemmeg ti National Bureau of Investigation (NBI) ti social media personality ken founder ti Peanut Gallery Media Network (PGMN) a ni Franco Mabanta idi Mayo 5 gapu iti mapapati a panangkikilna (extortion) ken ni dati a House Speaker Martin Romualdez.
Segun ti NBI, a saan a panangsupring iti kalintegan ti prensa wenno iti kalintegan ti panangipeksa ti makagapu iti pannakaarestar ni Mabanta, no di ket ti panagusarna kadagitoy a kalintegan a kas panguartaanna.
Kuna ni NBI director Melvin Matibag a nakemmeg da Mabanta ken dagiti kakaduana babaen ti entrapment operation nga insayangkatda idi rabii ti Mayo 5, gapu iti reklamo ni Romualdez a panangkikil ni Mabanta.
Kuna ni Matibag a nangrugi daytoy idi mapapati a dimmawat da Mabanta iti dakkel a gatad ti kuarta tapno saanda nga iruar ti maysa a documentary a mangilangdet ken ni Romualdez iti isyu ti naanomalia a flood control project.
Kuna ni Matibag a ₱300 a milion ti mapapati a dawdawaten ni Mabanta ken ti kukuana a Peanut Gallery Media Network ti usarenda, ket nangrugi ti panangkikilda idi pay napan a tawen.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Malaksid ken ni Mabanta, naarestar met da Ericson James D. Pacaba, John Alexander Vasquez Gomez, Jardine Christian Requio Serrano, ken Franco Jose Gallardo.
Segun ken ni Matibag, indeliber dagiti operatiba ti NBI ti ₱75 a milion a marked money babaen ti tallo a maleta ken naipakaammo ti pannakaarestarda apaman nga inawat dagiti suspek ti kuarta.
Maidarumda iti robbery/extortion maibasar iti Revised Penal Code (RPC) mainaig iti Republic Act (RA) No. 10175 wenno ti Cybercrime Prevention Act of 2012.
Innayon ni Matibag nga im-imbestigarenda no adda pay sabali a politiko wenno personalidad a nabiktima dagiti suspek. (Aaron Recuenco and Jeffrey Damicog/Manila Bulletin//Lito Hilidon/Bannawag)
