Saan a pinatgan ti Quezon City Regional Trial Court (RTC) Branch 81 ti kiddaw ni abogado Manases Carpio a mangpasardeng iti maar-aramid a panangtaming ti Kamara iti kaso nga impeachment a maibusor iti asawana a ni Bise Presidente Sara Duterte.
Inlaksid ti Quezon City RTC Branch 81 ti kiddaw ni Carpio a writ of preliminary injunction a maibusor kada House Speaker Faustino “Bojie” Dy III, House Committee on Justice (HCOJ) chair Batangas Rep. Gerville Luistro, ken Bureau of Internal Revenue (BIR) Commissioner Charlito Martin Mendoza.
Maibasar iti pangngeddeng ti korte idi Mayo 6, saanda a kinanunongan ti kiddaw ni Carpio a pannakaipaulog ti writ of preliminary injunction gapu ta awan ti hurisdiksion ti korte iti daytoy.
Segun iti RTC, saan a mabalin a makibiang ti hudikatura iti panangtungpal dagiti kameng ti Kamara iti annongenda a maitunos iti Konstitusion.
Iti petision nga impila ni Carpio, kiniddawna a lapdan koma ti korte ti HCOJ a mangiruar kadagiti subpoena ken tignay a mainaig iti kaso nga impeachment kontra ken ni Duterte, kangrunaan ti tax record ken dadduma pay a dokumento nga adda pakainaiganda nga agassawa.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Ngem kinuna ti RTC a nainkalintegan ti panangusar ti HCOJ iti bileg nga impaay kadakuada ti Konstitusion ken saan a mabalin a lapdan babaen ti panangiparit wenno injunction.
Innayon pay ti korte nga iti koma Korte Suprema (SC) ti nangidatagan da Carpio iti petision, idinto nga agtigtignay dagiti respondent a kas agpapada a sanga ti gobierno.
Rimmuar ti pangngeddeng ti korte kalpasan a nagkaykaysaan dagiti kameng ti HCOJ nga inkeddeng nga adda "probable cause" iti kaso nga impeachment ni Duterte ken naaprobaran ti articles of impeachment a mayawat iti plenario ti Kamara, a manamnama a pagbobotosanda inton Mayo 11. (Jose Cielito Reganit/PNA//Lito Hilidon/Bannawag)
