Impaulog ti Philippine National Police (PNP) ita nga aldaw, Mayo 11, ti subpoena para ken ni Senador Ronald “Bato” Dela Rosa mainaig iti panagimbestigarda kadagiti alegasion ti panangabuso tii human rights, agraman ti extra-judicial killings, a naaramid iti panangisayangkatda ti drug war idi nagakem a kas hepe ti polis iti Davao City.
Maibasar iti subpoena a pinirmaan ni Police Maj. Gen. Robert Alexander AA Morico II, daulo ti Criminal Investigation and Detection Group (CIDG), masapul nga agparang ni Dela Rosa iti Major Crimes Investigation Unit ti CIDG iti Camp Crame inton Mayo 14.
Idi Mayo 10, inwaragawag ni Sekretario ti Department of the Interior and Local Government (DILG) Jonvic Remulla ti pannakailukat manen ti imbestigasion kadagiti naaramid a panangabuso iti drug war.
Naisayangkat daytoy gapu iti pannakaipaulog ti warrant of arrest kontra ken ni Dela Rosa kas "co-perpetrator" iti kaso a crimes against humanity ni dati a presidente Rodrigo Duterte iti International Criminal Court (ICC).
Segun iti subpoena, no saan a makatungpal ni Dela Rosa nga awan ti balido a rason, mabalin a maidarum daytoy iti Indirect Contempt of Court kas maibasar iti Rule 71, Revised Rules of Court mainaig iti Section 1 of Republic Act (R.A.) No. 10973, ti linteg a mangipapaay iti hepe ti PNP ken opisial ti CIDG a mangipaulog kadagiti subpoena iti panangiwayatda iti imbestigasion.
255 a kongresman, immanamong iti kaso nga impeachment kontra ken ni VP Duterte
Tallo ti adres ni Dela Rosa a naikabil iti subpoena -- iti opisinana iti Senado ken dua nga adres iti Davao Region. (Aaron Recuenco/Manila Bulletin//Lito Hilidon/Bannawag)
