Mabalin a mabukel a dagus a kas impeachment court ti Senado inton Mayo 13 no mayawat kadakuada ti articles of impeachment a maibusor ken ni Bise Presidente Sara Duterte inton Mayo 12.
Daytoy ti kinuna ni Senador Sherwin Gatchalian iti maysa nga interbiu idi Mayo 10, ket patienna a nainkalintegan ti panangtamingda a dagus ti articles of impeachment apaman a maawatda daytoy.
Manamnama a maanamongan iti Kamara ti articles of impeachment ita nga aldaw, Mayo 11.
Segun ken ni Gatchalian, sisasagana ti Senado nga agbalin a kas impeachment court a mangtaming ken mangbista iti kaso ni Duterte.
Iti sabali a bangir, naipadamag ti pananggandat ti minority bloc nga idadauluan ni Sen. Alan Peter Cayetano nga isayangkat ti maysa a kudeta tapno masukatan ni Senate President Vicente “Tito” Sotto III ket malapdanda ti pannakabista ti impeachment ni Duterte.
Presidente Marcos, nagpaayab iti special session ti Kongreso inton Hunio 17
Ngem saan a naaramid daytoy gapu iti kaawan ni Sen. Ronald “Bato” Dela Rosa iti Senado sipud pay idi Nobiembre 2025.
Kinuna ni Sen. Erwin Tulfo a saan a nasayaat ti ania man a panggep a kudeta a mangipasdek iti baro a daulo ti Senado tapno laeng malapdan ti pannakataming ti kaso nga impeachment kontra ken ni Duterte.
Dinakamat ni Tulfo ti resulta ti survey a mangipakpakita a kayat ti publiko a matuloy ti impeachment trial kontra iti bise presidente.
Segun ken ni Gatchalian, natalged ti saad ni Sotto kas Senate President gapu ta nasayaat ti ipakpakitana a panangisadulo iti Senado, kangrunaan ita a narikut ti tiempo. (Hannah L. Torregoza/Manila Bulletin//Lito Hilidon/Bannawag)
