Aganay a 1,009 nga agmulmula iti tabako iti lokalidad ti Narvacan ti impaayan ti Provincial Government of Ilocos Sur (PGIS) iti ₱3,000 cash fuel subsidy.
Indauluan ni Provincial Agriculturist Engr. Julius Bragado dagiti provincial staff manipud iti Provincial Government of Ilocos Sur a nangidanon iti fuel subsidy a naiprograma ti gobierno probinsial, iti panangidaulo da Gobernador Jerry Singson ken Bise Gobernador Ryan Singson.
Mainaig itoy, impeksa ni Mayor Edna Cabalo Sanidad ti panagyamanna kada Gob. Jerry Singson ken Bise Gob. Ryan Singson iti dakkel nga ayat ken tulong ti probinsia kadagiti agmulmula iti tabako iti pannakailatang ti pundo para kadakuada itoy a kangitingit ti tiempo gapu iti ingingina iti langis kas imbunga iti mapaspasamak a riribuk iti Middle East.
Ginuyugoy pay ti Mayora dagiti mannalon a yad-aduda ti imulada a birhinia tapno dakdakkel met laeng ti maisubli kadakuada a tulong kas sagudayen ti RA 7171 wenno Tobacco Excise Tax Law. (ELISEO B. CONTILLO)
