Saan a ti warrant of arrest ni Senador Ronald “Bato” Dela Rosa iti International Criminal Court (ICC) ti makagapu iti kaadda dagiti kameng ti Philippine Marines iti arubayan ti Senado iti Siudad ti Pasay ita nga aldaw, Mayo 12.

Segun ken ni panakangiwat ti Amed Forces of the Philippines (AFP) Col. Francel Margareth Padilla, paset daytoy ti nabayagen a sayangkatda a panagbantay kadagiti kangrunaan a pasdek ti gobierno iti nadumaduma a paset ti pagilian.

Kuna ni Padilla a nangisaadda met kadagiti kameng ti Marines iti Malakanyang, ken iti yan ti monumento ni Jose Rizal iti Luneta Park.

Rimmuar dagiti pattapatta iti internet a panagtignay ti militar mainaig iti pannakaarestar ni Dela Rosa iti ICC.

Impaganetget ni Padilla a maipaay iti seguridad ti bambantayan dagiti kameng ti Marines a naisaad iti aglawlaw ti pasdek ti Senado.

Nasional

Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla

Iti sabali a bangir, inwaragawag ni undersecretary ti Presidential Communications Office (PCO) Claire Castro nga awan ti natakuatanda a panggep a panangrippuog iti gobierno.

Ngem inlawlawag ni Castro nga ammoda no asino ti mabalin a paggapuan dagitoy, ken ammoda no asino ti kayat nga ipatugaw dagitoy.

Kiniddaw ni Castro nga agridam ti publiko kadagiti palso a damag a maiwarwaras.(Martin Sadongdong/Manila Bulletin//Lito Hilidon/Bannawag)