Pormal a ninaganan ti Kamara idi Mayo 12 dagiti 11 a kongresman nga agpaay a kameng ti prosecution team a mangtaming iti kaso nga impeachment ni Bise Presidente Sara Duterte iti Senado.
Idauluan ni Justice Committee Chairperson Gerville Luistro (Batangas, 2nd district) dagiti abogado a kongresman nga agpaay a kas prosecutor.
Mairaman iti prosecution team da Joel Chua (Manila, 3rd district), Leila de Lima (Mamamayang Liberal Party-list), Terry Ridon (Bicol Saro Party-list), Jose Manuel “Chel” Diokno (Akbayan Party-list), Ysabel Maria Zamora (San Juan City, lone district), Lordan Suan (Cagayan de Oro City, 1st district); Jonathan Keith Flores (Bukidnon, 2nd district); Lorenz Defensor (Iloilo, 3rd district); Ramon Rodrigo “Rodge” Gutierrez (1-Rider Party-list), ken Arlene “Kaka” Bag-ao (Dinagat Islands, lone district).
Nabukel ti prosecution team maysa nga aldaw kalpasan ti panagbotos ti Kamara a mang-impeach ken ni Duterte iti maikadua a daras iti las-ud ti dua a tawen, gapu iti maipagarup a saan nga umisu a pannakausar ti confidential funds, saan a pudno a pannakaideklarar iti sanikua, saan a mailawlawag a kinabaknang, ken panangpangta kadagiti nangato nga opisial ti pagilian. (Ellson Quismorio/Manila Bulletin//Lito Hilidon/Bannawag)
